Konu einni í Pittsburgh í Bandaríkjunum var illa brugðið um liðna helgi þegar hún komst að því að fyrrverandi kærasti hennar, maður sem hún hafði nokkrum vikum áður fengið nálgunarbann gegn, dvaldi á heimili hennar.

Konan sagði við lögreglu að hana hafi grunað að óboðinn gestur hefði verið á heimilinu þegar klósettsetan hafði verið skilin eftir uppi. Þá rakst hún á teppi á gólfinu í kjallaranum, teppi sem hún kannaðist ekki við að hafa skilið eftir.

Það var svo síðastliðinn laugardag að grunur konunnar fékkst staðfestur. Þá gerði maðurinn, Cary Cocuzzy, sig líklegan til að ráðast á hana. Stökk hann úr felum bak við hurð og lagði hendur fyrir munn fyrrverandi kærustu sinnar. Hún náði að losa sig og kalla eftir aðstoð.

Konan hafði fengið nálgunarbann gegn Cary fyrir mánuði vegna ofbeldis sem hann hafði beitt hana. Hann mátti ekki setja sig í samband við hana og varð að halda sig í ákveðinni fjarlægð frá heimili hennar.

Konan, sem er 37 ára, segir við bandaríska fjölmiðla að hún sé þakklát fyrir að tvær dætur hennar hafi ekki verið heima þegar Cary reyndi að ráðast á hana. Hvetur hún konur til að vanda sig þegar kemur að því að velja sér maka.

Cary, sem er 31 árs, sagði við lögreglu að hann hefði ekki átt í nein hús og vildi ekki búa á götunni. Hann viðurkenndi að hafa sofið uppi á háalofti konunnar og leikur grunur á að hann hafi búið í húsinu, að stóru leyti, undanfarnar tvær vikur. Hann hefur verið ákærður fyrir innbrot og þarf að mæta fyrir dómara þann 2. maí næstkomandi