Yfirvöld í Norður-Kóreu fóru fram á það að Bandaríkjamenn myndu greiða sem nemur 250 milljónum króna vegna dvalar Otto Warmbier á sjúkrahúsi í Norður-Kóreu.

Otto var bandarískur háskólanemi sem var dæmdur til fimmtán ára erfiðisvinnu í landinu, eftir að hann stal skilti af hóteli í höfuðborginni Pyongyang. Hann var handtekinn á leið úr landi í ársbyrjun 2016 eftir fimm daga heimsókn til Norður-Kóreu.

Otto lést sumarið 2017 en hann var lagður inn á sjúkrahús skömmu eftir að dómur féll. Mál hans vakti mikla athygli og töldu ýmsir að hann hafi látist eftir skelfilega meðferð hjá norðurkóreskum yfirvöldum. Yfirvöld þar í landi sögðu að Otto hefði fengið sperðileitrun sem að lokum dró hann til dauða.

Yfirvöld í Norður-Kóreu féllust á það vorið 2017 að leyfa Otto að yfirgefa landið. Var hann fluttur meðvitundarlaus til Bandaríkjanna en ekki löngu eftir komuna þangað lést hann.

Áður en að þessu kom fóru yfirvöld í Norður-Kóreu fram á það að Bandaríkjamenn myndu greiða tvær milljónir dala vegna umönnunar Otto á sjúkrahúsi. Bandarísk sendinefnd er sögð hafa skrifað undir samkomulag um greiðsluna að beiðni Donalds Trump, Bandaríkjaforseta.

AP-fréttastofan greinir frá því að reikningurinn hafi legið, ógreiddur, hjá bandaríska fjármálaráðuneytinu. CNN segir að Bandaríkjamenn hafi ekki enn greitt reikninginn en ekki liggur fyrir hvort það standi til.

Í fréttum bandarískra fjölmiðla kemur fram að það sé skýr stefna yfirvalda að greiða ekki „lausnargjald“ fyrir bandaríska ríkisborgara sem haldið er í öðrum löndum. Faðir Otto, Fred Warmbier, hafði ekki heyrt af reikningnum en sagði að málið hljómaði allt eins og bandarísk yfirvöld hefðu samþykkt að greiða lausnargjald.