Rannsóknin var gerð af vísindamönnum við Harvard School of Public Health að sögn NBC News.
„Það að eiturefni hafi fundist í rafrettum styrkir þær vaxandi áhyggjur sem við höfum af rafrettum.“
Hefur NBC News eftir David Christiani, prófessor í umhverfiserfðafræði, sem vann að rannsókninni.
Ásamt félögum sínum rannsakaði hann 75 vörur frá 10 vinsælustu rafrettumerkjunum í Bandaríkjunum. Í 17 af þessum 75 vörum, eða 23 prósent þeirra, fundust leifar af inneitri (endotoxin). Einnig kom í ljós að meira magn af inneitri var í vörum með ávaxtabragði en öðrum. Í 61 af þessum 75 vörum, eða 81 prósent þeirra, fundust ummerki eftir glucan en það er í frumuvegg flestra sveppategunda. Bæði þessi efni hafa verið tengd við mörg heilsufarsvandamál, þar á meðal astma, minni lungnavirkni og sýkingar.
Vísindamennirnir vita ekki með vissu hvaðan eiturefnin koma en hafa þá kenningu að þau komi frá bómullarveggjum rafretta.
En þrátt fyrir þessar niðurstöðu benda vísindamennirnir á að rannsóknin hafi ekki sannað að rafrettur séu óheilsusamlegri en talið hefur verið fram að þessu. Þeir vonast þó til að rannsóknin geti beint meiri athygli að hugsanlegum heilsufarsáhrifum rafretta.
Niðurstöður rannsóknarinnar hafa verið birtar í vísindaritinu Environmental Health Perspectives.
