Lögreglan í Þýskalandi leitar nú að ökumanni sem fékk að reynsluaka bifreið í borginni Dusseldorf. Ekki var um neina venjulega bifreið að ræða heldur sjaldgæfan Ferrari sem metinn er á 230 milljónir króna.
Bifreiðin sem um ræðir er rúmlega þrjátíu ára gömul og eru ekki ýkja mörg slík eintök til í heiminum.
Maðurinn sem um ræðir þóttist vera áhugasamur kaupandi en um var að ræða einkasölu. Kaupandinn áhugasami og eigandinn mæltu sér mót á mánudag og skelltu sér í bíltúr. Þegar eigandinn og áhugasami kaupandinn ætluðu að skipta um sæti gaf ökumaðurinn í og stakk af um það leyti sem eigandinn steig út úr bílnum.
Lögreglan hefur nú biðlað til almennings um aðstoð við málið en ekkert hefur sést til bílsins eða ökumannsins síðan á mánudag. Bíllinn sem um ræðir er af gerðinni Ferrari 288 GTO og var hann skráður árið 1985.