Deutsche Welle skýrir frá þessu. Lögin voru samþykkt með naumum meirihluta íhaldsflokksins og hins mjög svo hægrisinnaða Frelsisflokks. Þingmenn annarra flokka voru á móti frumvarpinu.
Reiknað er með að látið verði reyna á gildi laganna fyrir stjórnarskrádómstóli landsins. Miklar umræður hafa verið um frumvarpið í Austurríki en í því segir meðal annars að „fatnaður sem byggir á ákveðinni hugmyndafræði eða trú og er ætlaður til að hylja höfuð“ verði bannaður í grunnskólum.
Ekki er sagt beinum orðum að hér sé átt við höfuðklúta múslima en ríkisstjórnin hefur slegið því föstu að kollhúfur, sem sumir gyðingadrengir bera, eða höfuðfatnaður shíka falli ekki undir lögin.
Stærstu samtök múslima, IGGO, í Austurríki hafa fordæmt lögin og segja þau „skammarleg“ og til þess fallin að auka á klofning í samfélaginu og benda á að „örfáar“ stúlkur beri höfuðklúta í grunnskólum landsins.
Sebastian Kurz, kanslari, telur bannið verða til þess að bæta aðlögun múslima að samfélaginu.