Thomas J. Summerwill, 21 árs, hefur verið ákærður fyrir að hafa drepið móður sína með hafnaboltakylfu að morgni 24. mars síðastliðinn. Verjandi hans segir að um hörmulegt slys hafi verið að ræða þar sem Thomas hafi talið að um innbrotsþjóf væri að ræða.

Samkvæmt frétt The Chicago Sun Times vaknaði Thomas að morgni og taldi að innbrotsþjófur væri í húsinu. Hann sótti hafnaboltakylfu og lamdi „innbrotsþjófinn“ margoft í höfuðið. Hann segist ekki hafa séð að þetta var móðir hans.

Móðirin, Mary Summerwill 53 ára, lést síðar á sjúkrahúsi af völdum höfuðáverka. Thomas gaf sig sjálfur fram við lögregluna og er sagður hafa stuðning fjölskyldu sinnar í málinu.

Liam Dixon, lögmaður Thomas, segir að þeir skilji afstöðu saksóknara en bendi á að hér hafi verið um hörmulegt slys að ræða og að samfélaginu stafi engin ógn af Thomas.

Saksóknari telur að hugmyndir Thomas um að hann hafi orðið móður sinni að bana í sjálfsvörn geti ekki staðist því hann hafi verið undir áhrifum áfengis og hafi því ekki getað hugsað rökrétt þegar þetta gerðist.