Lögreglumenn sem framkvæmdu húsleit um borð í skipi við höfnina í Moerdijk áttu fótum sínum fjör að launa þegar það byrjaði skyndilega að sökkva. Talið er að sérstökum búnaði hafi verið komið fyrir í því til að eyða sönnunargögnum.

Lögregla hafði fengið ábendingu um að framleiðsla fíkniefna færi fram í umræddu skipi. Grunurinn reyndist á rökum reistur því um borð fann lögregla talsvert magn metamfetamíns, en söluverðmæti efnanna nemur rúmum 4,5 milljónum evra.

Eftir að lögreglumenn fóru um borð fór sjór skyndilega að streyma inn í skipið. Talið er að kveikt hafi verið á þar til gerðum búnaði með fjarstýringu með það fyrir augum að eyða sönnunargögnum.

Í frétt Guardian, sem fjallar um málið, kemur fram að húsleitin hafi farið fram skömmu eftir miðnætti á laugardagskvöld. Skipið sökk að hluta en lögregla telur að engin sönnunargögn hafi farið til spillis. Var sérstökum búnaði – sambærilegur þeim sem notaður þegar olíuleki kemur upp – komið fyrir við skipið til að tryggja að efnin færu ekki út í vistkerfið

Rannsókn á málinu stendur yfir en ekki liggur fyrir hver eða hverjir stóðu að baki verksmiðjunni.