Það var komið nokkuð fram á kvöld á sunnudag þegar Elden Howard og tveggja ára sonur hans voru að stússast í garðinum við heimili þeirra í óbyggðum Kentucky í Bandaríkjunum.
Þegar Elden fór að gá að þeim litla komst hann að því, sér til mikillar skelfingar, að pilturinn, Kenneth Howard, væri horfinn. Elden leitaði bæði inni og úti en allt kom fyrir ekki; sá stutti var horfinn.
Það var ekki fyrr en í gær, tæpum þremur dögum eftir hvarfið, að Kenneth fannst á lífi og það nokkuð fjarri heimilinu. Hann hafði einfaldlega ráfað í burtu frá heimilinu.
Í frétt ABC kemur fram að aðstæður í nágrenninu séu ekki ýkja skemmtilegar; stórgrýtt og mikið um hóla og hæðir. Þrátt fyrir að tæpir þrír dagar væru liðnir frá hvarfinu var Kenneth við þokkalega heilsu. Hann var þó fluttur á sjúkrahús vegna vökvaskorts.
Elden segist hafa verið himinlifandi þegar hann fékk fréttirnar um að drengurinn væri fundinn. „Ég trúði þessu ekki fyrr en ég sá mynd af honum. Þetta eru bestu fréttir sem ég hef fengið.“