The Telegraph birti ýmis atriði úr drögum nýja samningsins í gær. Þar kemur meðal annars fram að ekki á að gera miklar breytingar á tollasamstarfi við ESB eða skipan mála á landamærum Írlands og Norður-Írlands.
Stuðningsfólk Brexit í hennar eigin flokki segit að drögin séu ekkert annað en „endurtekning“ af þeim samningi sem þingið hefur hafnað þrisvar sinnum. May sagði sjálf í gær að nýi samningurinn verði „nýtt og djarft tilboð“. Hann muni höfða breitt til þingmanna og vera betrumbætt útgáfa aðgerða sem geta hlotið breiðan stuðning.
Samkvæmt drögunum mun þingið hafa síðasta orðið þegar kemur að stöðu mála á landamærum Írlands og Norður-Írlands. Þá á þingið að hafa meiri áhrif á viðskiptasamninga framtíðarinnar.
Stuðningsmenn Brexit segja að „hér sé ekkert nýtt á ferð“. Þetta muni ekki hafa nein áhrif á þá sem styðja útgöngu úr ESB og hafa sumir jafnvel sagt að þetta muni hafa þveröfug áhrif.
Á föstudaginn slitnaði upp úr viðræðum Íhaldsflokks May og Verkamannaflokksins um samstarf varðandi Brexit. Stærsta ágreiningsefnið var krafa Verkamannaflokksins um að Bretar kjósi aftur um Brexit en það vill May ekki fallast á.