Þessi ákvörðun Google kemur í kjölfar ákvörðunar bandarískra stjórnvalda um að setja Huawei á svartan lista þar sem talið er að fyrirtækið geti ógnað öryggi Bandaríkjanna og Bandaríkjamanna.
Símar frá Huawei missa samstundis aðgang að uppfærslum á Android og nýir símar munu ekki innhalda þjónustur á borð við Google Play Store, Gmail og YouTube appið. Huawei mun aðeins geta notað þá útgáfu Android sem er öllum aðgengileg.
Reuters segir að bandaríska viðskiptaráðuneytið íhugi nú að milda þær aðgerðir sem hefur verið gripið til gagnvart Huawei til að koma í veg fyrir að símar, sem nú þegar hafa verið seldir, lendi í vandræðum með aðgang að ýmsum þjónustum og internetinu.
Ekki er enn fullljóst hversu illa það kemur við Huawei að vera komið á svartan lista bandarískra stjórnvalda en ýmsir sérfræðingar hafa velt því upp að hugsanlega geti fyrirtækið ekki haldið áfram starfsemi.
Huawei hefur á undanförnum árum unnið að viðbragðsáætlun ef fyrirtækinu yrði bannað að nota Android. Fyrirtækið segist komið nokkuð áleiðis í að gera eigin stýrikerfi og að hluti þess sé nú þegar í notkun í kínverskum vörum.
Þeir sem nota Huawei núna og eru með aðgang að Google Play Store mun áfram geta sótt uppfærslur á öppum frá Google en geta ekki uppfært sjálft stýrikerfið. Þetta mun ekki hafa mikil áhrif á kínverska markaðnum því flestar vörur Google eru bannaðar í Kína.
Í morgun var síðan tilkynnt að Intel, Qualcomm og Broadcom hafi slitið samstarfi sínu við Huawei.