Tuttugu og tveir einstaklingar voru handteknir í fimm löndum í síðustu viku í einni stærstu lögregluaðgerð sem Europol hefur farið í.

Mennirnir eru allir grunaðir um að tengjast skipulögðum glæpasamtökum sem stunduðu það að smygla fíkniefnum og sígarettum til Bretlands. Peningar sem fengust fyrir sölu efnanna í Bretlandi voru svo fluttir til Póllands þar sem þeir voru þvættaðir og notaðir til fasteignakaupa, meðal annars á Spáni.

Höfuðpaurinn í samtökunum er sagður vera 48 ára Lithái sem var handtekinn á Spáni. Aðrir grunaðir í málinu voru handteknir í Póllandi, Litháen, Bretlandi og Eistlandi.

Þá segir Europol að meðlimir gengisins hafi verið viðriðnir morð, en nánari upplýsingar um þær grunsemdir eru ekki tíundaðar nánar í tilkynningu Europol sem Guardian vitnar til.

Í aðgerðunum lagði lögregla hald á mikið magn peninga en auk þess lúxusbíla, demanta, gullstangir, skartgripi og fíkniefni.

Um 450 lögreglumenn tóku þátt í aðgerðunum og voru húsleitir gerðar á yfir 40 stöðum.