Sjö mánuðir eru nú liðnir síðan sextán ára stúlka, Karlie Guse, hvarf að því er virðist sporlaust frá heimili sínu við ríkismörk Kaliforníu og Nevada. Málið kom upp um svipað leyti og önnur ung stúlka, Jayme Closs, var numin á brott af heimili sínu og foreldrar hennar myrtir.

Foreldrar Karlie hafa nú komið fram í bandarískum fjölmiðlum í þeirri von að einhver geti varpað ljósi á hvarfið sem er öllum mikil ráðgáta. Lítið hefur farið fyrir málinu að undanförnu en foreldrar hennar ræddu þó hvarfið í viðtali við Dr. Phil fyrir skemmstu.

Kvöldið áður en Karlie hvarf hafði hún verið með kærasta sínum og vinum þeirra. Umrætt kvöld höfðu þau reykt gras og það virðist hafa farið illa í Karlie sem byrjaði að haga sér einkennilega.

Úr varð að Melissa Guse, stjúpmóðir Karlie, sótti stúlkuna sem var hrædd og allt að því með ofsóknaræði. Þegar heim var komið ræddu Melissa og faðir Karlie, Zac Guse, við hana um grasreykingar og tóku samtalið upp á síma í þeim tilgangi að sýna henni síðar hvaða áhrif neyslan hafði á hana.

En þegar Melissa og Zac vöknuðu daginn eftir var Karli á bak og burt og hefur hún ekki sést síðan. Einhver vitni töldu sig hafa séð hana á gangi með fram California 6-hraðbrautinni sem liggur áleiðis til Massachusetts en leit á svæðinu hefur engan árangur borið. Enginn virðist vita hvort einhver hafi tekið hana upp í bílinn hjá sér eða hvort Karlie hafi gengið út í óbyggðir þar til hún hreinlega örmagnaðist.

„Það eru liðnir sjö mánuðir,“ segir móðir hennar, Lindsay Fairley, í samtali við Fox News. Zac hringdi í Lindsay um leið og hann áttaði sig á því að stúlkan væri horfin. Lögregla hefur kannað hvort eftirlitsmyndavélar gætu nýst við rannsókn málsins en svo er ekki. Á meðan engar nýjar upplýsingar berast er fjölskyldan algjörlega í myrkrinu.

„Ég mun aldrei gefast upp í leitinni að henni. Það er mörgum spurningum ósvarað en það veit einhver hvar hún er,“ segir Lindsay.