Einhverjir þekkja það eflaust að hafa farið á stefnumót sem ekki gekk að óskum af einhverjum ástæðum. En þú getur væntanlega þakkað fyrir að hafa ekki farið á stefnumót með hinum 35 ára John Martin Hill. Kona ein endaði á að tapa milljónum eftir að hafa komist í kynni við hann.

Forsaga málsins er sú að John hafði skráð sig á stefnumótavefinn Match.com. Þar hitti hann umrædda konu sem hefur mögulega talið að þarna væri draumaprinsinn loksins kominn.

Í frétt NBC News kemur fram að John hafi sannfært konuna, sem búsett er í Alpharetta í Georgíuríki, um að hann væri milljónamæringur. Ekki var liðin vika þar til John hafði bað hana að giftast sér og eins og í sönnu ástarævintýri sagði hún já.

Það var þá sem konan lenti í kröppum dansi og John byrjaði að svíkja af henni fé. Hann sannfærði hana um að millifæra 80 þúsund Bandaríkjadali, tæpar tíu milljónir króna, þar sem John hugðist kaupa hús og húsgögn svo þau gætu búið saman undir sama þaki.

Þegar konan hafði millifært peningana á reikninginn sleit hann öllum samskiptum við konuna; svaraði ekki lengur í síma og ekki heldur tölvupóstum eða skilaboðum.

Það var ekki fyrr en lögregla birti mynd af John að hjólin fóru að snúast við rannsókn málsins. Þá stigu fjölmargar fram og sögðust ýmist vera – eða hafa verið – í sambandi við umræddan mann. Á endanum fannst John á hóteli Marriott-keðjunnar og reyndi hann að fela sig undir borði í ráðstefnuherbergi þegar hann varð var við lögregluna.

Málið þykir allt hið undarlegasta en John þessi er, að sögn lögreglu, búsettur í Duluth í Georgíuríki þar sem hann á eiginkonu og barn. Hann er sagður hafa notast áður við nafnið Gregory Hill og stundað sömu iðju undir því nafni.

John er nú á bak við lás og slá og gæti átt þungan dóm yfir höfði sér.