Litlu mátti muna að illa færi þegar Austin Thomson, 25 ára íbúi í Jefferson City í Missouri í Bandaríkjunum, var í þvottahúsinu á heimili sínu að setja í þvottavél.
Skömmu áður hafði hann orðið var við að farið væri að hvessa og skyndilega fór að hellirigna. Austin hætti að lítast á blikuna þegar flaggstöng í garðinum lagðist á hliðina og rúður í húsinu hans, sem er tvær hæðir, byrjuðu að splundrast. Sem betur fer slasaðist Austin ekki en síðar kom í ljós að skýstrókur hafði gengið yfir húsið.
Minnst þrír hafa látist í óveðri sem gengið hefur yfir Missouri undanfarna daga. Í gær gerði skýstrókur íbúum í Jefferson City lífið leitt og urðu talsverðar skemmdir af hans völdum. Þeir þrír sem létust voru búsettir í Golden City í Barton-sýslu í Missouri.
Yfirvöld í Missouri segja að 22 tilkynningar um skýstróka hafi borist undanfarna daga.
Á þessum árstíma ganga skýstrókar jafnan yfir Missouri og nágrannaríkin en nákvæmlega átta ár eru liðin síðan 161 lést þegar skýstrókur fór yfir borgina Joplin í Missouri. Veðurspár gera ráð fyrir áframhaldandi óstöðugleika í veðrinu og hafa til dæmis íbúar í Ohio verið hvattir til að vera á varðbergi.