102 ára kona liggur nú undir grun um að hafa drepið 92 ára gamlan nágranna sinn á hjúkrunarheimili í Chézy-sur-Marne í Frakklandi. Ef sá grunur reynist á rökum reistur gæti konan setið ein að þeim vafasama heiðri að vera elsti morðingi sögunnar.
Í frétt BBC kemur fram að fórnarlambið hafi fundist látið í herbergi sínu á laugardagskvöld. Að sögn saksóknara virðist hafa verið þrengt að hálsi fórnarlambsins og það látist vegna köfnunar. Þá voru einnig áverkar á höfði fórnarlambsins.
Konan sem liggur undir grun í málinu hefur dvalið í næsta herbergi við fórnarlambið. Hún gaf sig sjálf fram við starfsfólk hjúkrunarheimilisins þar sem hún sagðist hafa „drepið einhvern“.
Frederic Trinh, saksóknari í málinu, segir við fjölmiðla að ekki hafi reynst unnt að yfirheyra konuna enn sem komið er.