Thomas Silverstein, 67 ára fangi sem dæmdur var í lífstíðarfangelsi fyrir morð, lést á bak við lás og slá. Mál Silverstein hefur reglulega skotið upp kollinum í umræðu um fangelsismál í Bandaríkjunum því hann var hvorki meira né minna en 35 ár í einangrun.
Silverstein var fyrst stungið í steininn árið 1978 fyrir vopnað rán. Innan veggja fangelsisins gekk Silverstein af göflunum þegar hann drap tvo samfanga sína og fangaverði. Árið 1983 var hann settur í einangrun þar sem hann var meira og minna þar til hann lést.
Í frétt CNN kemur fram að Silverstein hafi afplánað í nokkrum fangelsum, þar á meðal Leavenworh í Kansas og San Quentin í Kaliforníu. Í Atlanta var honum haldið í litlum gluggalausum klefa neðanjarðar og var ljós í klefanum allan sólarhringinn. Þá var fylgst með honum á eftirlitsmyndavélum allan tímann. Nú síðast afplánaði hann í Supermax-fangelsinu í Colorado.
Silverstein stefndi fangelsisyfirvöldum árið 2007 þar sem hann taldi að einangrunarvistin bryti í bága við lög. Niðurstaða fékkst loks í málið árið 2014 þegar dómstóll mat það sem að einangrun í 30 ár bryti ekki gegn ákvæðum bandarísku stjórnarskrárinnar.