Í Tijuana, sem er á landamærum Mexíkó og Bandaríkjanna, er líkhúsið sprungið og hefur ekki kælirými fyrir öll þau lík sem þangað eru flutt. Íbúar í nágrenni líkhússins kvarta undan óþef og margir halda fyrir nef sér þegar þeir ganga framhjá líkhúsinu. Þar þarf stundum að stafla líkunum í hrúgur á gólfinu þar til pláss losnar í kæli. San Diego Reader skýrir frá þessu.
Ofbeldisverk hafa færst mikið í vöxt í bænum. Á hverjum morgni er komið með fjölda líka í líkhúsið en þau finnast mörg hver á götum úti. En ástandið í Tijuana er ekki einsdæmi því hið sama er uppi á teningnum víða um land. Á fyrstu þremur mánuðum ársins voru 8.493 morð skráð í landinu en það er tæplega 10% aukning frá sama tíma á síðasta ári. Á síðasta ári voru 33.341 morð skráð í landinu en hætt er við að þau hafi verið mun fleiri þar sem margra er saknað og má telja líklegt að mörg lík séu ófundin og/eða muni aldrei finnast.
Ástandið er sérstaklega slæmt í Guanajuato ríki þar sem tveir eiturlyfjahringir berjast um yfirráðin. En Tijuana er hins vegar höfuðborg morða í heiminum þessi misserin.
Mörg morðin eru grimmdarleg og fá mikið á marga Mexíkó og eru þeir þó ýmsu vanir í þessum efnum. Má þar nefna morð á 13 manns í í fjölskylduboði í Veracruz í apríl. Yngsta fórnarlambið var aðeins eins árs. Samkvæmt frásögnum vitna neyddu morðingjarnir fórnarlömbin til að horfa á sig áður en þeir skutu þau.
Blaðamenn og stjórnmálamenn eru oft fórnarlömb ofbeldismannanna. Bæjarstórinn í Tlaxiaco var myrtur í janúar eftir að hafa verið í embætti í tvær klukkustundir. Tveir bæjarstjórar til viðbótar voru myrtir í apríl. Fimm blaðamenn hafa verið myrtir það sem af er ári og er Mexíkó hættulegasta land heims fyrir blaðamenn að starfa í.
Áralangt stríð yfirvalda við eiturlyfjahringina hefur ekki borið mikinn árangur. Eins og fyrr sagði voru 33.341 morð skráð hjá yfirvöldum á síðasta ári. Það var meira en nokkru sinni áður síðan opinber skráning hófst 1997. 2017 voru morðin 28.866 en til samaburðar má nefna að það ár voru 17.284 morð framin í Bandaríkjunum þar sem 330 milljónir manna búa en í Mexíkó búa 130 milljónir. Flestir afbrotamenn í Mexíkó komast upp með afbrot sín því aðeins tekst að upplýsa og refsa fyrir tæplega 10% tilkynntra afbrota.