Kellen Winslow Jr., fyrrverandi leikmaður í bandarísku NFL-deildinni, á lífstíðarfangelsisdóm yfir höfði sér eftir að hafa verið sakfelldur í gær fyrir skelfilegan glæp.
Kellen var ákærður og sakfelldur fyrir að nauðga 58 ára konu í Encinitas, norður af San Diego í Bandaríkjunum, á síðasta ári. Konan sem um ræðir er heimilislaus. Kellen var ákærður fyrir fleiri nauðganir, til að mynda á 54 ára konu á síðasta ári og unglingsstúlku árið 2003. Kviðdómur er enn að ræða þann anga málsins.
Winslow spilaði fyrir Cleveland Browns, Tampa Bay Buccaneers, Seattle Seahawks, Net England Patriots og New York Jets. Hann er talinn hafa þénað sem nemur rúmum fimm milljörðum króna á þeim tæpu 10 árum sem hann spilaði í NFL-deildinni á árunum 2004 til 2013. Verði hann sakfelldur fyrir alla ákæruliði á hann lífstíðardóm yfir höfði sér.