Konan var 39 ára þegar hún lést. Lík hennar fannst í febrúar í stól á heimili hennar. New York Post skýrir frá þessu. Krufning leiddi í ljós að líffæri hennar voru í góðu lagi, að hún var ekki með neinn sjúkdóm og að engin merki voru um mikið magn af alkóhóli eða öðrum fíkniefnum í líkama hennar nema hvað mikið magn af THC, virka efninu í marijúana, var í líkama hennar.
„Það virðist sem þetta mikla magn THC hafi valdið dauða hennar. Krufningin leiddi ekkert annað í ljós.“
Sagði Chisty Montegut, dánardómsstjóri, í samtali við New Orleans Advocata. Hún sagði að THC valdi því að líkamsstarfsemi neytenda breytist og það geti valdið örum hjartslætti, miklum ótta og að lokum hjartaáfalli.
Unnusti hinnar látnu sagði lögreglunni að hún hafi notað rafrettu með kannabisolíu. Magn THC í blóði hennar var 15 sinnum meira en vænta mátti og því var niðurstaða krufningarinnar að ofneysla THC hafi orðið henni að bana.
Montegut sagði að til að jákvæð svörun fáist við marijúana í eiturefnaprófi verði magn þess að vera hærra en 0,5 nanógrömm í hverjum millilítra blóðs. Í konunni mældist magnið 8,4 nanógrömm.
Bernard Le Foll, prófessor og sérfræðingur í málefnum fíkniefnaneytenda við Toronto háskóla, segir „mjög ólíklegt“ að konan hafi látist af völdum ofneyslu á THC. Hann segir að magnið, sem mældist í blóði hennar, sé ekki sérstaklega mikið.