Tveir meintir heróínsmyglarar voru handteknir fyrir helgi á Autobahn 17 við Bad Gottleuba í Þýskalandi, ekki fjarri tékknesku landamærunum. Þar var tollgæslan með hefðbundið eftirlit með bílum þegar málið kom upp. Akstur grárrar Mercedes bifreiðar var stöðvaður en í bifreiðinni voru tveir mongólskir ríkisborgarar. Þeir framvísuðu báðir diplómatavegabréfum og mótmæltu harðlega áhuga tollvarða á bíl þeirra sem þeir sögðu njóta sömu friðhelgi og þeir njóti sem diplómatar.

Eitthvað fannst tollvörðunum þetta allt hið undarlegasta mál og settu sig í samband við þýska utanríkisráðuneytið sem upplýsti að mennirnir tveir hefðu ekki fengið viðurkenningu sem diplómatar í Þýskalandi og það sama ætti við um bíl þeirra. Af þeim sökum ætti friðhelgi diplómata ekki við í þeirra tilfelli.

Að þessum formsatriðum loknum opnuðu tollverðirnir farangursrými bifreiðarinnar þar sem þeir fundu 140 pakka með heróíni. Í hverjum þeirra var hálft kíló.

Mennirnir voru handteknir og úrskurðaðir í gæsluvarðhald. Rannsókn stendur nú yfir á málinu og verða mennirnir væntanlega ákærðir fyrir smygl.