Það vakti talsverða athygli í nóvember 2017 þegar listaverk, sem Leonardo da Vinci var sagður hafa málað, var slegið á 450 milljónir dala, 56 milljarða króna á núverandi gengi, á uppboði hjá Christie‘s í New York.
Verkið sem um ræðir heitir Salvator Mundi en áhöld eru uppi um það hvort Leonardo da Vinci sjálfur hafi málað verkið eða einhver af lærisveinum hans.
Eftir kaupin var greint frá því að Badr bin Abdullah bin Mohammed bin Farhan Al Saud hefði keypt verkið, en hann er menningarmálaráðherra Sádi-Arabíu. Margir höfðu þó uppi efasemdir um að Al Saud hefði borgað fyrir verkið enda eru 56 milljarðar engir smápeningar þó þeir séu það kannski í augum konungsfjölskyldunnar í Sádi-Arabíu.
Nú hefur ArtNet, fréttavefur sem sérhæfir sig í fréttum af dýrum listaverkum, komist að því að verkið hangi um borð í einni af glæsilegustu snekkjum heims. Umrædd snekkja er í eigu Mohammed Bin Salman, krónprinsins í Sádi-Arabíu, sem virðist því hafa keypt verkið.
Snekkjan sem um ræðir heitir Serene og eru hvorki fleiri né færri en 50 manns í áhöfn. Snekkjan er að sjálfsögðu búin öllu því glæsilegasta sem hugurinn girnist. Bin Salman keypti hana af rússneska milljarðamæringnum Yuri Shefler sem græddi vel á Stolichnaya-vodkanum, en talið er að Bin Salman, eða fulltrúar hans, hafi staðgreitt snekkjuna.
Saga listaverksinsins, Salvator Mundi, er um margt áhugaverð en fyrir 60 árum var talið að verkið væri einskis virði, eða því sem næst. Árið 2005 keyptu listaverkasafnarar í New York, Alexander Parrish og Robert Simon, verkið fyrir 10 þúsund Bandaríkjadali. Þeir sendu verkið svo til sérfræðings sem gerði það upp og fínpússaði.
Það var svo árið 2008 að hópur sérfræðinga var fenginn til að skoða verkið og töldu þær allar líkur á því að Da Vinci hefði í raun og veru málað það. Í kjölfarið rauk verðmæti verksins upp og varð það sem fyrr segir dýrasta málverk sögunnar haustið 2017.