Þetta kemur fram í nýrri skýrslu sem Happiness Research Institute gerði fyrir Norrænu ráðherranefndina. Spurningum var beint til 1.160 ungmenna frá Norðurlöndunum fimm. Öll eru þau Facebooknotendur og var haft samband við þau í gegnum Facebook. 82% þeirra eru stúlkur.
Út frá svörum þeirra komust skýrsluhöfundar að þeirri niðurstöðu að okkur vanti meiri víðsýni í viðhorfi okkar til samfélagsmiðla. Oft er sett samasemmerki á milli tímans sem fer í notkun samfélagsmiðla og hugsanlegrar sóunar á lífinu eða þá er sagt að fólk sé háð samfélagsmiðlum. En svona einfalt er þetta ekki.
Í skýrslunni kemur til dæmis fram að það að deila tenglum og vera í beinum samskiptum við vini á samfélagsmiðlum eykur í raun vellíðan ungmenna. Þau ungmenni sem eru meira til hlés í notkuninni og renna augunum yfir skjáinn og skoða prófíla annarra án þess að vera sjálf virk upplifa frekar einmanaleika og lítið sjálfsmat.
Það eru aðallega stúlkur og þeir sem eru í viðkvæmri stöðu félagslega sem verða fyrir neikvæðum áhrifum af notkun samfélagsmiðla.