Vísindamenn hafa fundið nokkuð heillegt höfuð af risastórum úlfi. Það fannst í sífrera í Síberíu og er rúmlega 40.000 ára gamalt. Höfuðið hefur varðveist ótrúlega vel og það sama má segja um heila hans og feld, sem minnir einna helst á feld mammúta. Auk þess eru tennurnar á sínum stað. Talið er að dýrið hafi verið tveggja til fjögurra ára þegar það drapst.

Albert Protopopov, prófessor í steingervingafræði, segir að hér sé um einstakan fund að ræða því aldrei fyrr hafi svo vel varðveittar líkamsleifar fullvaxins risaúlfs fundist.

Vísindamenn við náttúrufræðisafnið í Svíþjóð munu nú rannsaka erfðaefni úlfsins og bera það saman við erfðaefni úlfa nútímans til að kortleggja þróun tegundarinnar.

Höfuðið er 40 sm á lengd en til samanburðar má geta þess að skrokkur nútíma úlfa er 66 til 88 sm á lengd.