Lögreglan á Kýpur hefur fundið líkamsleifar sex ára stúlku sem grunur leikur á að raðmorðinginn Nicos Metaxas hafi myrt. Metaxas var handtekinn á dögunum og játaði hann í kjölfarið sjö morð.
Líkamsleifarnar fundust í Memi-stöðuvatninu suðvestur af höfuðborginni Nicosiu. Lík stúlkunnar var bundið við steypuklump svo það myndi ekki leita upp á yfirborðið. Áður en Metaxas myrti stúlkuna drap hann móður hennar.
Metaxas er væntanlega fyrsti kýpverski raðmorðinginn, sem vitað er um. Í aprílmánuði fundust lík tveggja filippeyskra kvenna, sem hurfu í maí og ágúst á síðasta ári, í inngangi að námu nærri Nicosia. Þriðja líkið fannst á skotæfingasvæði hersins við lok mánaðarins. Þrjú lík til viðbótar hafa fundist síðan þá og nú það fjórða. Lögregla telur ekki ástæðu til að ætla að fórnarlömb Metaxas séu fleiri.
Síðast voru fleiri en einn myrtir af sama aðilanum á Kýpur 1993 en þá var tveimur konum frá Svíþjóð og Úkraínu rænt og þær myrtar.
Flestar konurnar, sem Metaxas er grunaður um að hafa myrt, eru frá Filippseyjum. Þær höfðu komið til Kýpur í atvinnuleit en hurfu síðan. Yfirvöld töldu að þær hefðu farið úr landi.