Svo virðist sem asískar vespur séu farnar að gera sig gildandi á Bretlandseyjum og óttast Bretar að tegundin muni ná fótfestu þar áður en langt um líður. Tegundin sem um ræðir, Vespa velutina, hefur meðal annars sést á eyjum í Ermarsundi, Jersey til dæmis.

Flugan er árásargjörn en í frétt Morgunblaðsins frá árinu 2009 var greint frá því að sex manns í Frakklandi hefðu verið lagðir inn á spítala eftir að hafa orðið fyrir stungu. Þá hafði flugan nýlega náð fótfestu í Frakklandi, en talið er að hún hafi komið þangað fyrst árið 2004 frá Kína með skipi sem innihélt keramikfarm.

Það sem veldur þó einna mestum áhyggjum eru áhrifin á aðrar flugnategundir og eru býflugnaræktendur sagðir hafa sérstakar áhyggjur. Asíska vespan getur lagt slík býflugnabú í rúst á aðeins nokkrum mínútum.

Í frétt Mail Online kemur fram að óvenjulegt veðurfar það sem af er sumri hafi gert flugunni auðveldara fyrir en ella. Þannig hefur rignt mikið á Bretlandseyjum að undanförnu og aðstæður sagðar hinar bestu fyrir flugurnar.

Starfsmenn við meindýravarnir á Ermarsundseyjunum hafa þegar eyðilagt þrettán bú asísku vespunnar það sem af er sumri, en allt árið 2018 fundust tólf bú. Þá hefur flugan einnig sést á meginlandi Bretlands, til dæmis í Gloucesterskíri á suðurhluta Englands og í norðurhluta Devon.