Bandaríska kántrýstjarnan Granger Smith og kona hans, Amber Bartlett, minnast sonar síns, River, í átakanlegu myndbandi sem þau birtu á dögunum. River lést af slysförum í maímánuði en hann drukknaði í tjörn við heimili fjölskyldunnar í Texas. River var þriggja ára.

Í myndbandinu stíga Granger og Amber fram og þakka fyrir þann stuðning og hlýhug sem þau hafa fundið fyrir undanfarnar vikur. Í myndbandinu, sem ber yfirskriftina Finding Light in Our Darkest Time, birta þau myndir af River, allt frá því hann var smásnáði á fæðingardeildinni.

Í myndbandinu segir Smith að dóttir hans, London, hafi spurt hann hversu langan tíma bróðir hennar hafi fengið á jörðinni. Þegar hann hafi lagt dæmið saman hafi hann komist að því að hann hafi lifað í rétt rúmlega þúsund daga. Ljóst sé að River hafi notið hvers einasta dags sem hann fékk.

Smith segir í myndbandinu að fjölskyldan þurfi ekki á vorkunn að halda þó hún eigi um sárt að binda. „Hann hafði áhrif á líf margra og það er mikilvægt að ráfa ekki um í myrkrinu að eilífu. Við áttum ótrúlegan dreng í þrjú ár og fyrir það erum við þakklát.“

Myndbandið má sjá hér að neðan: