Þetta eru niðurstöður nýrrar þýskrar rannsóknar sem var birt í síðustu viku. Fram kemur að gröftur eftir Bitcoin valdi meiri losun koltvíildis en ríki á borð við Eistland, Króatíu og Jórdanía losa.
Samkvæmt frétt Danska ríkisútvarpsins reiknuðu vísindamenn við tækniháskólann í München út að tölvur, sem grafa eftir Bitcoin, noti rafmagn sem svarar til losunar 22 til 22,9 milljóna tonna af koltvíildi árlega. Þess má geta að 2015 nam losun koltvíildis á Íslandi 11,3 milljónum tonna eftir því sem segir á Vísindavef Háskóla Íslands.
Bitcon kom fram á sjónarsviðið fyrir um áratug. Ekki er vitað hver bjó rafmyntina til en viðkomandi gengur undir dulnefninu Satoshi Nakamoto. Þetta var fyrsta rafmyntin en í dag eru til margar slíkar. Rafmynt byggist á dulkóðun og er eiginlega rafrænn gjaldmiðill. Færslur með rafmynt eru nafnlausar og ekki í gegnum banka. Hægt er að geyma rafmyntir í „veskjum“ á netinu. Þær eru búnar til eða „grafnar upp“ af tölvum með notkun flókinnar stærðfræði. Það skýrir hina miklu rafmagnsnotkun.
