Verði mannfjöldinn kominn í 9,7 milljarða árið 2050, eins og spá Sameinuðu þjóðanna segir til um, mun það vera aukning um tvo milljarða á næstu 30 árum, fréttastofan AP skýrir frá þessu.
Í skýrslunni kemur einnig fram að fólksfjöldinn á jörðinni verði kominn í u.þ.b. 11 milljarða fyrir lok aldarinnar.
Einn skýrsluhöfunda, John Wilmoth, segir þó að það verði að taka þessum 11 milljörðum með fyrirvara, þar sem enn eru mörg ár til loka aldarinnar.
Samkvæmt Sameinuðu þjóðunum, mun um helmingur fólksfjölgunarinnar til ársins 2050, verða í níu löndum. Þessi lönd eru Indland, Nígería, Pakistan, Kongó, Eþíópía, Tansanía, Indónesía, Egyptaland og Bandaríkin. Af þessum níu löndum mun aukningin verða mest á Indlandi og minnst í Bandaríkjunum. Mannfjöldinn mun tvöfaldast í þeim ríkjum Afríku sem liggja fyrir sunnan Sahara.
Vararitari Efnahags- og félagsmálanefndarinnar, Lu Zhenmin, segir í fréttatilkynningu, að þetta geti valdið vandræðum.
Margir þeirra þjóðfélagshópa þar sem aukningin er sem mest eru frá fátækum löndum. Þetta gerir það erfiðara að berjast gegn fátækt, auka jafnrétti kynjanna og bæta heilbrigðiskefið, segir hann.
Í skýrslunni kemur einnig fram að auk fólksfjölgunarinnar sé mannkynið að eldast, og fæðingartölur á heimsvísu fari lækkandi. Árið 1990 fæddi hver kona 3,2 börn að meðaltali, en árið 2019 mun hver kona fæða 2,5 börn að meðaltali. Talan mun lækka í 2,2 börn að meðaltali árið 2050. Hæstu fæðingartölurnar eru í Afríkuríkjum sunnan Sahara, þar fæðir hver kona 4,6 börn að meðaltali.
Fólkinu mun þó ekki fjölga í öllum ríkjum heimsins. Íbúafjöldinn mun lækka um 1%, í meira en 55 löndum á næstu 30 árum. Sem dæmi má nefna að íbúafjöldinn í Kína mun lækka um 31,4 milljónir fyrir árið 2050.