Sautján ára piltur slasaðist nokkuð illa þegar rafretta sprakk í munni hans. Móðir hans hafði keypt rafrettuna fyrir hann til að aðstoða hann við að hætta að reykja.
Myndir af meiðslunum má sjá hér að neðan en athygli er vakin á því að þær kunna að vekja óhug hjá fólki.
Fjallað er um málið í læknaritinu New England Journal of Medicine sem birtir myndir af munni piltsins, Austin Adams, eftir að rafrettan sprakk.
Í umfjöllun ritsins, sem fjölmiðlar víða um heim hafa fjallað um, kemur fram að Austin sé búsettur í Nevada í Bandaríkjunum. Rafrettan var frá framleiðanda sem heitir VGOD.
Kjálki piltsins brotnaði nokkuð illa og þá missti hann einnig nokkrar tennur.
Austin og móðir hans eru búsett nokkuð fjarri næsta sjúkrahúsi, en í umfjöllun New England Journal of Medicine kemur fram að fimm klukkustunda akstur hafi verið frá heimili þeirra að næsta sjúkrahúsi sem gat gert að meiðslunum.
„Hann man ekki til þess að hafa gert nokkuð rangt við meðferð rafrettunnar, hún virðist bara hafa sprungið,“ segir Katie Russell, læknir sem gerði að meiðslunum.
Bandaríska lyfjaeftirlitið, FDA, varaði við vissum tegundum rafretta árið 2017. Kom fram að viss lögun þeirra gæti aukið hættuna á að þær springi.
Í rannsókn sem gerð var á síðasta ári kom fram að 2.035 einstaklingar hafi leitað læknisaðstoðar á árunum 2015 til 2017 vegna rafretta sem sprungu. Í umfjöllun blaðsins kemur fram að rafhlöðurnar í rettunum eigi það til að ofhitna, til dæmis þegar þær komast í nálgæð við málmhluti, lykla sem dæmi.
Í umfjöllun bandarískra fjölmiðla kemur fram að Austin hafi nú náð fullum bata, en kjálkinn var víraður saman í sex vikur. Hann hefur nú hætt notkun rafretta.