Um 3.000 manns létust í hryðjuverkaárásunum á Bandaríkin þann 11. september 2001. Dagurinn er einn sá svartasti í sögu Bandaríkjanna en þá var tveimur flugvélum flogið inn í World Trade Center turnana í New York, þriðju vélinni var flogið á Pentagon og sú fjórða hrapaði til jarðar í Pennsylvania eftir að farþegarnir veittu flugræningjunum mótspyrnu. Al-kaída hryðjuverkasamtökin, með Osama bin Laden í fararbroddi, lýstu ódæðisverkunum á hendur sér. Bin Laden var síðan drepinn af bandarískum sérsveitarmönnum í Pakistan 2011. Nú segist Donald Trump, Bandaríkjaforseti, vita hver stóð á bak við árásirnar.
Samkvæmt frétt The Independent sagði Trump í viðtali að hann viti hver stóð á bak við árásirnar.
„Ég held að ég viti hver stóð í raun og veru á bak við árásirnar níunda september. Það voru ekki Írakar. Það voru aðrir.“
Hann skýrði mál sitt ekki nánar en bætti við að hernaður Bandaríkjanna í Miðausturlöndum í kjölfar árásanna hafi verið „versta ákvörðunin í sögu Bandaríkjanna“.
Árás Bandaríkjamanna og bandamanna þeirra á Írak 2003 kostaði meðal annars 4.000 bandaríska hermenn lífið, 179 breska hermenn auk hundruða þúsunda Íraka.
