Í desember á síðasta ári tók bílasali hjá Ford í Bolton í Ontario í Kanada eftir því að motta í farangursrými nýrrar Ford bifreiðar passaði ekki. Þetta vakti undrun hans og hann skoðaði málið betur og sá þá að mottan passaði í raun en það gerði varadekkið, sem var undir henni, ekki.

Hann hafði samband við lögregluna sem kom á vettvang og skoðaði dekkið og sá að það var fullt af metamfetamíni. Málið vatt upp á sig og við skoðun á varadekkjum fleiri nýrra Ford bifreiða fannst metamfetamín. Þær voru til sölu hjá 13 bílasölum í Kanada.

Bifreiðarnar, sem um ræðir, eru Ford Fusion en þær eru framleiddar í verksmiðju Ford í Hermosillo í Mexíkó og fluttar til Kanada með járnbrautarlest í gegnum Bandaríkin.  Einhversstaðar á leiðinni hafa óprúttnir aðilar komist í bifreiðarnar og skipt varadekkjunum út fyrir önnur full af metamfetamíni.

Hald var lagt á 180 kíló af efninum, í varadekkjum bifreiða hjá bílasölum og í tvö skipti þegar lögreglan leitaði í járnbrautarlestum sem fluttu bifreiðarnar til Kanada. Automotive News skýrir frá þessu.

Kanadíska lögreglan vinnur út frá þeirri kenningu að fíkniefnin hafi aldrei komist í hendur réttra viðtakenda og að það hafi verið skipulögð glæpasamtök sem stóðu á bak við smyglið. Enginn hefur verið handtekinn vegna málsins en þessari smyglleið hefur verið lokað.