Það er óhætt að segja að mikil eymd ríki hjá almenningi í Venesúela vegna hræðilegs efnahagsástands. Á meðan alþýðan lepur dauðann úr skel hefur valdastéttin það gott og makar krókinn. Milljónir landsmanna hafa flúið land og ekkert lát virðist vera á fólksflóttanum. Skelfilegri hagstjórn er um að kenna að mati sérfræðinga en landið hefur alla burði til að vera eitt auðugasta og þróaðasta landið í Ameríku. Nú er ástandið orðið svo slæmt að meira að segja hinir látnu fara ekki varhluta af því.

Í Maracaibo hafa þjófar brotist inn í El Cuadrado kirkjugarðinn og hafa innbrotin staðið yfir síðan síðasta haust. Þar stela þeir skreytingum og stundum hlutum af líkunum. Svo langt hefur verið gengið að gulltennur hafa verið rifnar úr líkum. Öryggisgæsla hefur verið hert í kirkjugarðinum og útfarartímum hefur verið breytt til að halda þjófum frá.

Eins og fyrr sagði er ástandið slæmt í Venesúela og einna verst er það í Maracaibo. Eins og annarsstaðar í landinu er mikill eða algjör skortur á helstu nauðsynjum. Borgin er sú næst stærsta í landinu og miðstöð olíuiðnaðarins sem var áður mikilvægasta tekjulind landsins. Samhliða versnandi efnahagsástandi byrjuðu íbúar borgarinnar að fara ránshendi um götur hennar og eyðileggja hús og fyrirtæki. Yfirvöld kenndu glæpagengjum um en hér var að sögn venjulegt fólk á ferð, örvæntingarfullt fólk sem átti hvorki í sig né á.