Það er semsagt djúp meining með þessum „hundsaugum“ þegar hundarnir senda okkur þetta augnaráð. Þeir hafa þróað þetta til að geta stjórnað okkur. Þetta eru niðurstöður nýrrar rannsóknar vísindamanna við Portsmouth háskóla en rannsóknin var nýlega birt í vísindaritinu Proceedings of the National Academy of Sciences.
Vísindamennirnir komust að því að hundar eru með vöðva við augabrúnirnar en úlfar hafa ekki slíka vöðva en þeir eru nánir ættingjar hunda. Þessir vöðvar gera hundum kleift af lyfta innsta hluta augabrúnanna. Slík augabrúnalyfting vekur þörf hjá fólki til að gæta hundsins því augu þeirra virðast stærri og líkjast augum kornabarns. Vísindamennirnir telja að þetta sé eitthvað sem hundar hafa þróað með sér því þeir hafi þörf fyrir að fólk hugsi um þá ef þeir ætla að lifa af.
Á vef Science Daily er haft eftir dr. Juliane Kaminski, sem stýrði rannsókninni, að þetta veiti hundum, sem geta hreyft augabrúnir sínar meira en aðrir hundar, ákveðið forskot og styrki „hundsauga“ einkennið í næstu kynslóðum.