Íbúar í Kansas City í Bandaríkjunum klóruðu sér margir í kollinum í gær þegar þeir komu auga á tvo kúlulaga hluti sem svifu um himininn. Veðurstofa Bandaríkjanna, National Weather Service, tjáði sig um málið á Twitter og sögðust menn þar á bæ ekki hafa neina skýringu á reiðum höndum.

Margir hafa tjáð sig um málið á Twitter og þar er enginn skortur á vangaveltum. Sumir skjóta á að þarna hafi verið á flugi tæki á vegum Google, en netrisinn stendur um þessar mundir fyrir verkefni sem kallast Google Loon. Markmiðið er að bæta netsamband í afskekktum byggðum. Svo voru vitanlega einhverjir sem skutu á að þarna væri komin fram sönnun fyrir tilvist geimvera.

Bandaríska veðurstofan telur ólíklegt að þarna hafi verið á flugi veðurkönnunarbelgir þar sem þeir virtust vera kyrrstæðir.

Í frétt KMBC kemur fram að líklegasta skýringin sé sú að þarna hafi verið á ferð einskonar loftbelgir á vegum bandaríska hersins. Um hafi verið að ræða tilraunaflug á mjög léttum loftbelgjum sem ferðast um loftin með vindinum.

Myndband af þessu má sjá hér að neðan:

This is June 4th, in Olathe, KS. Explain pic.twitter.com/sWqxasW3Wm

— Brian DeSanto (@brian_desanto) June 21, 2019