Afríkuríki með lítil eða meðalstór hagkerfi greiða miklu meira fyrir lyf en auðug ríki á borð við Bandaríkin og Bretland greiða. Í ríkjum á borð við Sambíu, Senegal og Túnis er venjulegt verkjalyf allt að 30 sinnum dýrara en í Bandaríkjunum og Bretlandi.

BBC skýrir frá þessu. Haft er eftir Kalipso Chalkidou, hjá miðstöð alþjóðlegrar þróunar, að lyfjamarkaðir í fátækum ríkjum „virki bara ekki“. Hún sagði að samkeppni í þeim sé ekki í lagi vegna „samþjöppunar í aðfangakeðjunni“. Hún er meðhöfundur að skýrslu um öflun lyfja en í henni var komist að þeirri niðurstöðu að lítil og meðalstór hagkerfi kaupi færri lyfjategundir sem aftur leiði til minni samkeppni, eftirlits og gæða.

Í skýrslunni kemur fram að auðug ríki geti aflað sér ódýrari lyfja í skjóli almannafjár og fleiri þátta. Einnig kemur fram að fátæk ríki hafi tilhneigingu til að kaupa dýrari lyf í stað ódýrari lyfja sem eru allt að 85% þeirra lyfja sem eru á markaði í Bandaríkjunum og Bretlandi.