Síðan 2014 hefur þess verið krafist í Noregi að eyru fólks sjáist á vegabréfsmyndum fólks. Þetta eru ekki allir sáttir við og segja þetta vera skerðingu á trúfrelsi. Þetta hefur komið fram í athugasemdum sem gerðar hafa verið við nýtt lagafrumvarp sem Stórþingið er nú með til meðferðar. 842 athugasemdir hafa borist.

Flestar eru þær frá einkaaðilum og flestir vilja afnema regluna um sýnileg eyru. TV2 skýrir frá þessu.

Samvinnuráð múslima í Rogalandi segir til dæmis í sinni athugasemd að krafan um sýnileg eyru brjóti gegn trúfrelsi fólks. Önnur samtök múslima taka undir þetta.

Tillögur hafa verið lagðar fram um að þeir sem nota trúarlegan höfuðfatnað þurfi ekki að sýna á sér eyrun á vegabréfsmyndum. Stjórnvöld hafa varið eyrnakvöðina með því að hún sé hluti af því að hægt sé að bera kennsl á fólk með öruggum hætti. Eyrun sé einstök eins og fingraför fólks.