Kerville Holness hélt að hann hefði aldeilis dottið í lukkupottinn þegar hann bauð 9.100 dollara, sem svara til um 1,1 milljóna íslenskra króna, í einbýlishús í Tamarac í Flórída í Bandaríkjunum. Hann taldið húsið vera 140.000 dollara virði, það svarar til um 17,6 milljóna íslenskra króna.

Það var Broward county bæjarfélagið sem stóð fyrir uppboðinu. En eitthvað misskildi Holness það því ekki var verið að bjóða húsið upp heldur smá landræmu við það, um 30 sm breiða og 30 metra langa. Landræman er aðeins 50 dollara virði. Holness hefur krafist endurgreiðslu en embættismenn segja að hana geti hann ekki fengið.

Landræman var boðin upp vegna vangoldinna fasteignagjalda í mars. Embættismenn segja að Holness geti ekki fengið endurgreitt þar sem lög Flórídaríkis heimili það ekki.

The Sun Sentinel hefur eftir Holness að bæjarfélagið hafi beitt blekkingum. Ekki hafi verið gefið til kynna eða sýnt að um landræmu væri að ræða en ekki húsið. Hann segist hafa byggt boð sitt á verðmæti hússins sem sést á myndinni sem hér fylgir.