Talið er að einn af hverjum fimm hælisleitendum sem leitað hafa hælis undanfarna mánuði komi allir frá eina og sama landinu.

Hér er um er að ræða Suður-Ameríkuríkið Venesúela en staða efnahagsmála í þessu mikla olíuríki er vægast sagt skelfileg. Tugir þúsunda hafa freistað þess að yfirgefa landið undanfarna mánuði þar sem matur, lyf og aðrar nauðsynjar hafa verið af skornum skammti.

Þetta er meðal þess sem kemur fram í nýrri skýrslu Sameinuðu þjóðanna, en AP-fréttastofan fjallar um efni hennar. Er hér um að ræða tölur yfir nýja hælisleitendur, það er einstaklinga sem leitað hafa hælis utan heimalands síns undanfarna átján mánuði. Athygli vekur að umsóknir um hæli frá ríkisborgurum Venesúela eru fleiri en umsóknir ríkisborgara stríðshrjáðra ríkja eins og Sýrlands og Afganistans.

Í frétt AP er meðal annars rætt við Johan Álvarez, fjölskyldumann frá Venesúela, sem ákvað að yfirgefa heimaland sitt. Þetta gerði hann þar sem hann gat ómögulega brauðfætt fjölskyldu sína, þar á meðal nýfæddan son. Hann gekk því af stað ásamt eiginkonu sinni og syni og leitaði hælis í Perú.

Í skýrslu Sameinuðu þjóðanna, sem kom út á miðvikudag, kom fram að um fjórar milljónir Venesúelamanna séu taldar búa utan heimalandsin. Í sömu skýrslu kemur fram að búist sé við því að fjöldinn muni halda áfram að vaxa og munu tæplega tvöfaldast árið 2020.