Tíu ár eru nú liðin frá einu dularfyllsta máli sem írska lögreglan hefur fengist við. Í júní 2009 fannst maður, sem kallaði sig Peter Bergmann, látinn á ströndinni við hafnarbæinn Sligo.
Síðar kom á daginn að nafnið Peter Bergmann var ekki hans rétta nafn. Þrátt fyrir ítarlega rannsókn lögreglu hefur enginn stigið fram og borið kennsl á þennan dularfulla mann sem sýndi býsna einkennilega hegðun dagana fyrir andlát sitt. Irish Times fór í saumana á málinu á dögunum.
Svo virðist vera sem maðurinn hafi gert sér ferð til Sligo í norðvesturhluta Írlands á þann 12. júní árið 2009. Ekki er vitað hver tilgangur heimsóknar hans til Sligo var en hann tók hótelherbergi á leigu á Sligo City Hotel og notaði til þess nafnið Peter Bergmann.
Peter Bergmann dvaldi á hótelinu og sagði starfsfólk að hann hafi virkað rólegur og yfirvegaður og talað með sterkum þýskum hreim. Þegar Bergmann fannst svo látinn, allsnakinn, á ströndinni þann 16. júní reyndi lögregla að varpa ljósi á það hvað hann hafðist við dagana fyrir andlátið.
Lögregla fór meðal annars yfir eftirlitsmyndavélar af hótelinu og nágrenni þess. Hann sást yfirgefa hótelherbergi sitt alls þrettán sinnum og í öll skiptin var hann með fjólubláan plastpoka meðferðis. Af myndum að dæma var pokinn fullur af einhverju en þegar hann sneri til baka var hann tómur. Hann sást aldrei losa sig við eitt né neitt og virðist hafa markvisst reynt að forðast eftirlitsmyndavélar fyrir utan sjálft hótelið.
Þá sást hann aldrei nota síma, hvorki farsíma né síma á hótelinu. Hann keypti tíu frímerki í Sligo en virðist þó ekki hafa sent nein bréf frá sér, hvorki frá pósthúsi bæjarins eða með því að setja bréfin í póstkassa. Bergmann, sem var á sjötugsaldri, virðist hafa haft áhuga á að sjósundi því leigubílstjóri í bænum steig fram og sagðist hafa rætt við hann kvöld eitt. Þá hafi maðurinn, Bergmann, spurt hann út í hentuga staði til sjósunds. Þá sáu vitni hann á ströndinni á kvöldin þar sem hann gekk meðfram sjónum, berfættur.
Það var svo að morgni 16. júní 2009 að vegfarandi sem var í göngutúr á ströndinni gekk fram á lík hans á grúfu í sandinum. Lögregla taldi í fyrstu að hann hefði drukknað en krufning leiddi í ljós að hann hafði fengið hjartaáfall. Þá leiddi krufningin í ljós að hann var með krabbamein í blöðruhálskirtli.
„Það væri auðvelt að draga þá ályktun að hann hafi verið fyrrverandi hermaður eða einhverskonar lögreglumaður,“ segir íbúi í bænum í samtali við Irish Times. Sannleikurinn er þó sá að lögregla er engu nær um hver hann var, hvers vegna hann notaði ekki sitt rétta nafn eða hvaðan hann kom. Þá vekur það ekki síður spurningar að enginn hafi stigið fram og borið kennsl á manninn.
