Sádí Arabía hefur opnað fyrir möguleikann á því að kaupa sér varanlegt dvalarleyfi í landinu. Með þessu er vonast til að laða erlenda fjárfesta til landsins, og umsækjendur verða að eiga nóg af peningum, því dvalarleyfið mun kosta 800.000 sádí arabíska riyals, sem samsvarar 26,6 milljónum króna. Bloomberg greinir frá þessu.

Ódýrari möguleiki verður einnig í boði. Fyrir aðeins 100.000 ryals, eða rúmar þrjár milljónir króna, verpur nefnilega hægt að kaupa árs dvalarleyfi í konungsríkinu. Dvalarleyfið mun gera útlendingum kleift að kaupa fasteignir og reka fyrirtæki í landinu án þess að þurfa að notast við sádí arabískan millilið. Einnig mun dvalarleyfið auðvelda fólki að skipta um starf og yfirgefa landið.

Auk gjaldins sem þarf að greiða, þurfa umsækjendur að hafa náð 21 árs aldri og geta sýnt fram á fjárhagslegt öryggi og hafa hreina sakaskrá.

Yfirvöld fleiri ríkja í miðausturlöndum eru að endurhugsa hlutverka útlendinga í löndunum. Í Sameinuðu arabísku furstadæmunum er í gangi áætlun sem mun gera velstæðum útlendingum kleift að sækja um 10 ára dvalarleyfi og í Katar er búið að samþykkja lög sem munu veita nokkrum útlendingum varanlegt heimili.

Hugmyndin um langtíma áætlun um dvalarleyfi útlendinga í Sádí Arabíu var fyrst kynnt af krónprinsinum, Mohammed bin Salman árið 2016, og er þetta hluti af áætlun hans sem á að gera það að verkum að landið þurfi ekki að treysta eins mikið á olíu og sem einnig á að auka erlenda fjárfestingar. Þegar hann kynnti áætlunina gerði hann ráð fyrir því að frá árinu 2020 myndi árleg velta af þessu verða um 10 milljarða dollara.