Frá 2003 til 2016 rannsökuðu vísindamenn sífrera á þremur stöðum í Kanada. Niðurstöður rannsókna þeirra voru að hann myndi ekki byrja að bráðna fyrr en eftir 70 ár. En nú er hann byrjaður að bráðna og það hratt. Sífreri er þegar jörð er stöðugt frosin en til að falla í þennan flokk verður hún að vera frosin í tvö ár samfellt.

Live Science skýrir frá þessu. Fram kemur að vísindamenn hafi nýverið birt niðurstöður rannsóknar sinnar í vísindaritinu Geophysical Research Letters.

„Það kom okkur á óvart að sjá að svæðin urðu svo fljótt fyrir áhrifum af hærri lofthita.“

Sagði Louise Farquharson, sem vann að rannsókninni, í samtali við Live Science.

Rannsóknin beindist að sífrera á þremur kanadískum eyjum. Nýlegar myndir af þeim sýna að jarðvegurinn er nú þakinn holum sem myndast þegar sífrerinn bráðnar og lítil vötn myndast, ekki aðeins á yfirborðinu heldur einnig djúpt niður í jarðveginn.

Þetta er athyglisvert ef litið er til þess sem loftslagsráð Sameinuðu þjóðanna segir um hækkandi hita á jörðinni en samkvæmt þeirri spá ætti sífrerinn ekki að byrja að bráðna svona fyrr en 2090.

Vísindamennirnir telja meðal þeirra þátta sem valda bráðnun sífrerans sé hærri lofthiti á sumrin, minni gróður sem veitir jarðveginum einangrun og minna af ís sem er frosinn við land.