Á ári hverju látast á milli 500.000 og 600.000 manns í Bretlandi. Nú er svo komið að breskir kirkjugarðar eru að verða fullir og því þarf að huga að nýjum stöðum til að grafa fólk. Fjölbreyttar og misgóðar tillögur hafa komið fram um hvernig sé hægt að finna öllu þessu fólki góða hvílustaði. Ein umdeildasta tillagan gengur út á að jarðsetja fólk meðfram hraðbrautum landsins.

The Guardian skýrir frá þessu. Með þessu á að vera hægt að hafa jákvæð áhrif á loftslagið því gróðursetja á tré um leið og fólk verður jarðsett. Það myndi þýða að hálf milljón trjá yrði gróðursett við hraðbrautir landsins árlega.

Tillagan er komin frá samtökum sem vinna að betri lífskjörum fólks um allan heim. En hún er umdeild og eiga frekari umræður örugglega eftir að fara fram um hana.

Sérfræðingar segja að líkbrennsla leysi ekki vandann því hún sé skaðleg fyrir umhverfið. Auk þess má ekki brenna fólk samkvæmt sumum trúarbrögðum.

Í Bandaríkjunum er nýjasta tískan að nota lík til moltugerðar. Þá er líkunum komið fyrir í endurnýtanlegum málmkistum ásamt efnum sem hraða niðurbroti líkamans. Eftir aðeins 30 daga á að vera hægt að gera mold úr líkunum. Stóra spurningin er því hvort Bretar muni horfa til þessarar aðferðar.