Síðustu 19 ár hefur Tim Henrik Bruun Hansen setið í Herstedvester fangelsinu í Danmörku en hann hefur setið samfleytt í fangelsi frá 1996. Hann var dæmdur til ótímabundinnar vistunar í fangelsi, en það er þyngsta refsing sem hægt er að dæma fólk til samkvæmt dönskum lögum, fyrir að hafa reynt að nauðga þremur ungum stúlkum.

Hann hefur ítrekað sótt um að vera látinn laus til reynslu en fangelsismálayfirvöld hafa alltaf hafnað þeirri ósk og segja hann of hættulegan umhverfi sínu og samfélaginu til að hægt sé að láta hann lausan.

Í dómi Hæstaréttar segir að til að hægt verði að láta hann lausan verði hann að fallast á að vera vanaður með lyfjum. Því hefur hann neitað. Hann stefndi danska ríkinu fyrir Mannréttindadómstólinn í Strasbourg vegna þessarar ákvörðunar Hæstaréttar og vegna neitunar á að hann fengi reynslulausn. Hann hélt því fram að það væri brot á mannréttindum hans að það væru fangelsismálayfirvöld sem tækju ákvörðun um hvort hann væri hæfur til að fá reynslulausn. Hér ætti hlutlaus aðili að taka ákvörðun en ekki sömu yfirvöld og vista hann í fangelsi.

Sakaskrá Hansen, sem er á sextugsaldri, er löng. Hann hefur hlotið marga dóma og eru þeir allir tilkomnir vegna nauðgana eða tilrauna til að nauðga börnum.

Mannréttindadómstóll Evrópu féllst á þriðjudaginn á málflutning lögmanns Hansen og segir í niðurstöðu að það sé brot á mannréttindum hans að óháður aðili leggi ekki mat á hvort óhætt sé að láta hann lausan. Þá finnur Mannréttindadómstóllinn einnig að niðurstöðu Hæstaréttar um að vana eigi Hansen með lyfjagjöf.