BBC skýrir frá þessu. Boðað hefur verið til verkfalla 26. og 27. júlí, 5. og 6. ágúst og 23. og 24. ágúst. Meðal þeirra sem fara í verkfall verða starfsmenn á þjónustuborðum, tæknimenn og öryggisverðir.
Stjórnendur flugvallarins eru kokhraustir og segjast vera tilbúnir með viðbragðsáætlun sem geri þeim kleift að halda flugvellinum opnum þessa daga og tryggja að flugumferð gangi vel fyrir sig.
Unite segir að boðað sé til verkfalla þar sem stjórnendur flugvallarins hafa hafnað kröfum félagsins um 2,75% launhækkun á næstu 18 mánuðum. Talsmaður Unite segir að starfsfólk sé mjög reitt vegna launamálanna en þau þurfi að vera í góðu lagi svo hægt sé að tryggja hnökralausan rekstur flugvallarins. Þá er einnig óánægja með að fólk fær misjöfn laun fyrir sömu vinnuna.
Heathrow er fjölfarnasti flugvöllurinn í Evrópu en á síðasta ári fóru 80,1 milljón farþega um hann. Hann er sjöundi fjölfarnasti flugvöllur heims.