Loftslagsbreytingarnar ógna Grænlandi á margvíslegan hátt og þar á meðal fortíð landsins, sögunni. Hún er að bráðna. Ef loftslagið heldur áfram að hlýna eins og nú mun 30 til 70 prósent af öllum fornleifum á Grænlandi glatast.

Þar á meðal eru leifar frá víkingatímanum og fyrstu íbúum landsins. Þetta kemur fram í nýrri skýrslu sem var birt á fimmtudaginn. TV2 skýrir frá þessu.

Haft er eftir Jørgen Hollesen, hjá danska þjóðminjasafninu og skýrsluhöfundi, að vísindamenn hafi síðan 2016 rannsakað mörg svæði við Nuuk en þar settust víkingar að í kringum árið 1000.

Hann sagði að rannsakað hafi verið hvaða áhrif hitastig hefði í jarðlögunum og væri niðurstaðan sú að ef hitinn hækkar um 2,5 gráður muni 30 til 70 prósent af fornleifunum hverfa eða rotna og þar með missi Grænland stóran hluta af fortíð sinni. Um 6.000 áhugaverðir staðir, út frá fornleifafræðilegu sjónarmiði, eru á Grænlandi.