Dómari í New York dæmdi í dag Joaquin „El Chapo“ Guzman í lífstíðarfangelsi, og þrjátíu ár að auki, fyrir eiturlyfjasmygl og peningaþvætti. Guzman, sem gengur undir nafninu „sá stutti,“ er frá Mexíkó og er einn þekktasti eiturlyfjasmyglari heims. Hann byggði upp mikið veldi í kringum starfsemina í heimalandi sínu.
Guzman var í aldarfjórðung stórtækur í eiturlyfjasmygli frá Mexíkó til Bandaríkjanna og var hann handtekinn tvisvar. Í fyrra skiptið slapp hann á ævintýralegan hátt úr fangelsi í Mexíkó með því að grafa göng úr fangelsinu, en í það síðara var gæsla um hann aukin til muna. Yfirvöld í Mexíkó framseldu Guzman síðan til Bandaríkjanna.
Fyrr í mánuðinum freistuðu lögmenn Guzmans að fá ný réttarhöld en þeirri beiðni var hafnað.
Saksóknarar sögðu, eftir að dómur féll í dag, að sakborningurinn yrði geymdur á bak við „tonn af stáli“ í sérstöku öryggisfangelsi í Colorado. Sjálfur sagðist Guzman hafa þurft að þola andlegt ofbeldi allan sólarhringinn síðustu vikur og að málsmeðferð hafi ekki verið sanngjörn.
Ekki er vitað hvort hann muni áfrýja niðurstöðunni.