Dagblaðið Algemeen Dagblad hefur komist yfir umrædda leyniskýrslu en í henni er því slegið fast að skipulögð glæpasamtök hafi náð sterkum tökum á lögreglunni um allt land. Fram kemur að sannanir hafi fundist fyrir samstarfi 19 lögreglumanna, úr miðhluta landsins, við glæpamenn.
Blaðið segir að tugum lögreglumanna hafi verið vikið úr starfi eða sendir í leyfi. Í skýrslunni kemur fram að margt bendi til þess að spilling, misnotkun valds, brot á þagnarskyldu, misnotkun á tölvukerfum lögreglunnar og vanræksla á að sinna starfi sínu sé meðal þess sem spilltir lögreglumenn gerast sekir um.
Í Utrecht var háttsettum lögreglumanni vikið úr starfi vegna gruns um að hann hafi fengið greiðslur frá þekktum fíkniefnasala sem er ákærður fyrir mörg alvarleg afbrot. Réttarhöld í máli hans og 15 samstarfsmanna hans standa nú yfir. Þeir eru sakaðir um að hafa skipulagt og staðið fyrir mörgum morð í undirheimum Utrecht.
Í Amsterdam var 55 ára lögreglumaður handtekinn og vikið frá störfum í síðustu viku grunaður um að vera með fíkniefni í fórum sér, misnotkun á tölvukerfum lögreglunna og að skýra óviðkomandi frá leynilegum upplýsingum. Þetta er sjöunda málið af þessu tagi sem kemur upp hjá lögreglunni í Amsterdam síðan í maí á þessu ári.
Í skýrslunni er komist að þeirri niðurstöðu að þrátt fyrir að mörgum hafi verið vikið úr starfi eða sendir í leyfi sé það líklegast bara toppurinn á ísjakanum.