Á myndinni sem hér fylgir sjást hjónin Darren og Carolyn Carter kyssast yfir skrokki glæsilegs ljóns sem þau höfðu nýlega drepið. Myndin var birt á Facebooksíðu Legelela Safaris sem sérhæfir sig í að bjóða breskum ferðamönnum upp á veiðiferðir til Suður-Afríku.

Texti myndarinnar var: „Erfiðisvinna í heitri sólinni í Kalahari . . . vel gert. Risastórt ljón.“

Mirror segir að hjónin, sem reka uppstoppunarfyrirtæki, segist vera „ástríðufullir verndarsinnar“.

Þetta hefur farið illa í fólk sem og textinn við myndirnar á Facebooksíðu Legelela Safaris. Við aðra mynd stóð: „Það jafnast ekkert á við að veiða konung skógarins í söndum Kalahari.“

The Sun hefur eftir sérfræðingum að ljónin séu alin upp í prísund eingöngu til að vera síðan drepin af blóðþyrstum ferðamönnum.

Legelela Safaris býður upp á gíraffaveiðar fyrir 2.400 pund, sebrahestaveiðar fyrir 2.000 pund en gefur ekki upp verð fyrir veiðar á hlébörðum, nashyrningum, ljónum og fílum en hvetur fólk til að hafa samband til að fá upplýsingar um verð.