Árið 1947 kynntust Marilyn Frances DeLaigle og Herbert De Laigle og var það ást við fyrstu sýn. Hún var 16 ára en hann 22 ára. Þau gengu í hjónaband ári síðar og lifðu saman í sátt og samlyndi alla tíð eftir það eða þar til síðasta föstudag þegar þau létust bæði. Það er því óhætt að segja að ástin hafi varað alla ævi hjá þeim.

Eins og fyrr sagði gengu þau í hjónaband 1948. Það varði þar til klukkan 02.20 aðfaranótt síðasta föstudags en þá lést Herbert. Nákvæmlega 12 klukkustundum síðar lést Marilyn. Þau bjuggu í Augusta í Georgíuríki í Bandaríkjunum. CNN skýrir frá þessu.

Saman upplifðu þau marga af stærstu viðburðum mannkynsögunnar á síðustu öld. Má þar nefna innreið sjónvarpsins, byggingu Berlínarmúrsins og fall hans. Ekki má gleyma tungllendingunni 1969 eða morðinu á John F. Kennedy.

Hjónin náðu að halda upp á 70 ára brúðkaupsafmæli sitt sem er nefnt platínubrúðkaup eða járnbrúðkaup. Þau eignuðust sex börn, 16 barnabörn, 25 barnabarnabörn og þrjú barnabarnabarnabörn.

Hjónin voru jarðsett á mánudaginn.