Jerry Foxhoven, 66 ára forstjóri félagsþjónustu í Iowa-fylki í Bandaríkjunum, var rekinn úr starfi sínu í seinasta mánuði. Ástæðan fyrir því virðist vera svakaleg ást á rapparanum Tupac. Frá þessu greinir New York Post.
Jerry átti það gjarnan til að senda samstarfsfélögum sínum tölvupóst sem fjallaði um Tupac, en Jerry var mikill aðdáandi rapparans.
Tölvupóstar Jerrys höfðu verið í sendingu í tvö ár, en í þeim fjallaði hann meðal annars um lagatexta Tupac. Samkvæmt frétt New York Post eiga tölvupóstarnir að hafa getað orðið allt að 350 blaðsíður.
Tupac-æði Jerrys var þó ekki bara í tölvupóstinum en auk þeirra hélt hann upp á Tupac-föstudaga á skrifstofu sinni þar sem hann spilaði tónlist rapparans og svo bauð hann upp á Tupac-kökur á afmælinu sínu.
Viðbrögð samstarfsfélaga Jerrys voru mismunandi, sumir hrósuðu honum á meðan aðrir kvörtuðu til yfirvalda.
Seinasti tölvupóstur Jerrys fór á alla starfsmenn skrifstofu félagsþjónustu fylkisins en þar hvatti hann til þess að haldið yrði upp á afmæli Tupac. Í kjölfarið bað ríkisstjóri Iowa, Kim Reynolds, Jerry um að segja af sér.
Jerry Foxhaven segir þó að hann viti ekki hversvegna hann var látinn fara. Hann segist þó ekki halda að það hafi verið vegna Tupac-tölvupóstanna.
Tupac var einn áhrifamesti og vinsælasti rappari tíunda áratugs seinustu aldar. Hann var myrtur árið 1996. Enn þann dag í dag eru margar samsæriskenningar á lofti varðandi morðið á honum.